राजेन्द्र कार्की । जाजरकोट
जिल्ला अस्पताल जाजरकोटमा उपचारका लागी आउने विरामी यतिवेला उपचार नपाएर फर्कने गरेका छन् । उपचार नपाउँदा विरामीहरु हजारौ खर्चेर जिल्ला बाहिर जान बाध्य छन् । अस्पतालमा कार्यरत डा. निशा बुढामगर नहुँदा चार महिना देखि दन्तसेवा ठप्प छ । दन्त चिकित्सक बुढा बाहेक दन्तसेवामा अरु स्वास्थ्यकर्मी छैनन् । उनी सुत्केरी विदामा बसेपछि सेवा नै ठप्प हुन पुगेको हो ।
सामान्य खालका अप्रेशन गर्ने, शल्यक्रिया सहितको प्रसुति सेवा दिने भनेर गत बर्ष अस्पताल आएका एमडिजिपी डा. महेश सिलवाल केही समय अघि जिल्ला छोडेर गएपछि शल्यक्रियाका सवै सेवा बन्द भएका छन् । स्वास्थ्य मन्त्रालयको छात्रबृत्ति कोटामा दुई बर्षको लागी करारमा नियुक्त भएर आएका डा.सिलवाल एक बर्ष विताएर फर्किएका हुन् । अस्पतालमा आवश्यक पुर्वाधार नभएको, वेहोस बनाउने एन्थेसिया स्वास्थ्यकर्मी नभएपछि दिक्क भएर आफु फर्किएको उनले बताए । सात जना विशेषज्ञ चिकित्सक सहित ६५ जना स्वास्थ्यकर्मीको दरबन्दी रहेको अस्पतालमा १८ जना स्वास्थ्यकर्मी मात्र कार्यरत छन् । छात्रबृत्ति करार सेवामा कार्यरत मेडिकल अधिकृतहरुले दुई बर्ष अघिको अतिरिक्त सेवाको भत्ता नपाएपछि काम गर्न जाँगर मारेका छन् । छात्रबृत्ति करार सेवामा ४ जना डाक्टर कार्यरत छन् ।
लामो समय देखि उनीले काम गरेको अतिरिक्त भत्ता नपाएपछि भिडियो एक्सरे सेवा बन्द गरिदिएका छन् । ल्याव सेवामा पनि स्वास्थ्यकर्मी नहुँदा बन्द छ । अस्पताल विकास समितिबाट पाउनु पर्ने अतिरिक्त समय काम गरेको भत्ता नपाउँदा सम्म विरोध स्वरुप आफुहरुले भिडियो एक्सरे सेवा नदिने निर्णय गरेको डा. भुपेन्द्रप्रकाश मल्लले बताए । यसरी विस्तारै धेरै सेवाहरु बन्द हुँदै गएपछि सेवाग्राही स्थानिय मर्कामा परेका छन् ।
अस्पतालमा कार्यरत अति न्युन संख्याका स्वास्थ्यकर्मीहरु पनि उपकरण पुर्वाधार र विशेषज्ञ ज्ञानको अभावले सामान्य चेकजाँच गरेर औषधी दिने र रेफर गर्ने बाहेक अन्य सेवा प्रवाह गर्न सकिरहेका छैनन् ।
स्वास्थ्य सेवा कार्यालयका निमित्त प्रमुख टीकाराम जैसीले अस्पतालको सेवा अस्तब्यस्त भएको स्वीकार गरे । विशेषज्ञ चिकित्सकको पदपुर्ती हुँदैन । अन्य स्वास्थ्यकर्मी पनि रित्तिदै गएका छन् । नयाँ पदपुर्ती हुँदैन । कसरी सेवा प्रभावकारी बनाउने उनले भने ‘करीव पाँच लाख रुपैया डाक्टरहरुले अतिरिक्त काम गरेकै दिन बाँकी छ । उहाँहरुले भिडियो एक्सरे सेवा बन्द गरेर असन्तुष्टि जनाउनु भएको छ । कसरी समाधान गर्ने ।’
चार बर्ष अघि १५ शैयाबाट ५० शैया बनाईएको जाजरकोट अस्पतालमा स्वास्थ्य सेवा ब्यवस्थापक, बालरोग, स्त्रीरोग, वेहोस बनाउने, जनरल फिजिसियन, अर्थोपेडिक सर्जन र पेडियाट्रिसियन गरी सात जना विशेषज्ञ, तीन जना मेडिकल अधिकृत र आयुर्वेद चिकित्सकको दरबन्दी रिक्त छ । त्यस्तै फिजियोथेरापी सहायक, मेडिकल ल्याव टेक्नोलोजिस्ट, रेडियोग्राफी टेक्नोलोजिस्ट र स्वास्थ्य सहायक तीनै जना रिक्त रहेका छन् । स्टाफ नर्स ८ मध्य ७ रिक्त छन् । पब्लिक हेल्थ नर्स, ल्याव टेक्निसियन, फार्मेसी सहायक, एनेस्थेसिया सहायक, ल्याव असिष्टेन्ट, र अहेव तीन जनाको दरबन्दीमा तीनै जना रिक्त रहेको स्वास्थ्य सेवा कार्यालयका प्रमुख जैसीले बताए । उनले पदपुर्तीका लागी सम्बन्धित निकायमा पहल गरेपनि सुनुवाई हुन नसकेको गुनासो गरे ।
अस्पतालमा भरपर्दो सेवाप्रवाह हुन नसकेपछि एक महिनाको अवधीमा एक जना पनि विरामी भर्ना गरिएको छैन । फार्मेसीमा कतिपय अत्याबश्यक औषधी समेत छैन ।
