राजेन्द्र कार्की । जाजरकोट
हरेक कार्यक्रम तथा पर्वमा डिजे र डेक बज्ने जाजरकोट सदरमुकाम खलंगामा लामो समय पछि स्थानिय लोक बाजा घन्किएका छन् । मंगलवार विहानै देखि गाँउ गाँउबाट लोक बाजा सहित आएका स्थानिय कलाकारले सदरमुकाम खलंगालाई संगीतमय बनाए । स्थानिय संस्कृतिको जगेर्न र संरक्षणका लागि आयोजित स्थानिय मौलिक सिंगारु नृत्य प्रतियोगितामा भाग लिन आएका सहभागीले मादल, कुर्कुटे, खैजेडी, बाँसुरी, टेम्को लगायतका बाजाले सदरमुकाम गुन्जायमान बनाए । जिल्लाका सम्पदा संरक्षण गर्ने उद्देश्यले ठीक एक बर्ष अघि स्थापना भएको जाजरकोट सम्पदा संरक्षण प्रतिष्ठानले आफ्नो बार्षिकोत्सवको अवसरमा सिंगारु नृत्य प्रतियोगिताको आयोजना गरेको थियो ।
स्थानिय कला संस्कृतिको संरक्षण गर्नका लागि जाजरकोटमा खलंगामा आयोजित स्थानिय मौलिक सिंगारु नृत्य प्रतियोगितामा जगतिपुरको सिंगारु नाच प्रथम भएको छ । सिंगारु नृत्यमा नलगाड द्धितिय, बोहरा गाँउको नृत्य तृतिय र पोखरा गाँउको सिंगारु नाच सान्तोना भएका छन् । नौ वटा समुह सहभागी भएको प्रतियोगितमा प्रथम हुने समुहलाई नगद २५ हजार, द्धितियलाई २० हजार, तृतियलाई १५ हजार र सान्तोना हुने समुहलाई १० हजार प्रदान गरिएको छ । सहभागी अन्य टीमलाई ५ हजार प्रदान गरिएको प्रतिष्ठानका अध्यक्ष जनक केसीले बताए । सिंगारु नृत्य हेर्न स्थानियको भीड लागेको थियो । लोप हुन थालेका स्थानिय कला, संस्कृति र सम्पदाको संरक्षण गर्ने उद्देश्यले सिंगारु नृत्य प्रतियोगिताको आयोजना गरेको अध्यक्ष केसीले बताए । पुरानो पुस्ताले मात्र जानेको र तर नयाँ पुस्ताले स्थानिय मौलिक लोक संस्कृति नसिकेपछि पुस्तान्तरणका लागि प्रतिष्ठानले सम्पदा संरक्षणका लागि विभिन्न कार्यक्रम गदै आएको उनको भनाई छ ।
प्रतिष्ठानका अध्यक्ष जनक केसीको अध्यक्षता र जिल्ला समन्वय समितिका संयोजक कालीबहादुर खत्रीको प्रमुख आतिथ्यतामा भएको कार्यक्रममा प्रमुख जिल्ला अधिकारी रामकुमार महतो, भेरी नगरपालिकाका उपप्रमुख सीता जैसी विशेष अतिथिको रुपमा रहेका थिए । उपप्रमुख जैसीले स्थानिय कलाकार सँग सिंगारु नाचेपछि कार्यक्रमको थप रौनकता बढेको थियो । कार्यक्रममा स्कुले बालबालिका देखि जेष्ठ नागरिकहरुको उपस्थिति रहेको थियो ।
