राजेन्द्र कार्की
जाजरकोट १६, साउन
च्याउको तरकारी खाएर गंभिर विरामी भएर प्रदेश अस्पताल सुर्खेतमा उपचार गराईरहेका जाजरकोटको कुशे गाउँपालिका १, स्याँक्रीका थप एक जनाको मृत्यु भएको छ । २३ बर्षिय ललित चलाउनेको शुक्रवार विहान उपचारको क्रममा मृत्यु भएको अस्पतालले जनाएको छ । च्याउ खाएर मृत्यु हुनेको संख्या पाँच पुगेको छ । मृत्यु हुनेहरु सवै एकै घरका हुन् ।
गत साउन ९ गते जंगलबाट च्याउ टिपेर घरमा ल्याई पकाएर खाएका टेकबहादुर चलाउने सहित परिवारका ८ जना विरामी परेका थिए । कर्णाली प्रदेश अस्पताल कालागाउँ सुर्खेतमा उपचारको क्रममा टेकबहादुरकी १६ बर्षिया छोरी औसरा, १३ बर्षिया छोरी धनसरा र ११ बर्षिय नातिनी निरुता सिंहको उपचारको क्रममा केही दिन अघि मृत्यु भएको थियो । चलाउनेकी ३ बर्षीया छोरी अञ्जनाको ११ साउनमा गाँउमै मृत्यु भएको थियो । घरमुली ५० बर्षीय टेकबहादुर चलाउने, ३० बर्षीय बुहारी कल्पना चलाउने, १५ बर्षिया छोरी पशुपति चलाउनेको प्रदेश अस्पतालमै उपचार भैरहेको वडाध्यक्ष गोपाल नेपालीले बताए ।
