राजेन्द्र कार्की
जाजरकोट १३, साउन
च्याउको तरकारी खाएर गंभिर विरामी परेका जाजरकोटको कुशे गाउँपालिका १, स्याँक्रीका एकै घरका थप तीन जना बालबालिकाको उपचारको क्रममा सुर्खेतमा मृत्यु भएको छ । सोमवार गाँउमै एक जना बालिकाको मृत्यु भएको थियो ।
च्याउ खाएर मृत्यु हुनेको संख्या चार पुगेको छ । गत साउन ९ गते जंगलबाट च्याउ टिपेर घरमा ल्याई पकाएर खाएका टेकबहादुर चलाउने सहित परिवारका ८ जना विरामी परेका थिए । कर्णाली प्रदेश अस्पताल कालागाउँ सुर्खेतमा उपचारको क्रममा टेकबहादुरकी १६ बर्षिया छोरी औसरा, १३ बर्षिया छोरी धनसरा र ११ बर्षिय नातिनी निरुता चलाउनेको उपचारको क्रममा मृत्यु भएको प्रदेश अस्पतालका मेडिकल विभाग प्रमुख डाक्टर के.एन. पौडेलले बताए । चलाउनेकी ३ बर्षीया छोरी अञ्जनाको सोमवार गाँउमै मृत्यु भएको थियो । विसालु च्याउ खाएर गंभिर विरामी भएका सात जनालाई नेपाली सेनाको हेलिकोप्टरबाट उपचारका लागि सोमवार नै सुर्खेत लगिएको थियो ।
विरामी परेका एक जनाको अवस्था गंभिर रहेको र तीन जनाको अवस्था सामान्य रहेको डा. पौडेलले बताए । ढिलो गरि अस्पताल ल्याएको हुँदा च्याउको विषले धेरै असर गरिसकेको रहेछ जति कोसिस गर्दा पनि बचाउन सकिएन डा. पौडेलले भने विषले शरीर विषाक्त बनाईसकेको थियो ।
स्थानिय जनक उपचारका लागि स्थानिय स्वास्थ्य संस्थामा लैजादै गर्दा अञ्जनाको मृत्यु भएको हो । घरमुली ५० बर्षीय टेकबहादुर चलाउने, ३० बर्षीय छोरा ललित चलाउने, ३० बर्षीय बुहारी कल्पना चलाउने, छोरी पशुपति चलाउनेको सुर्खेतमै उपचार भैरहेको छ । गाँउपालिकाले निजी खर्चमा हेलिकोप्टर चार्टर गरेर विरामीको उद्धार गरेर सुर्खेत पुरयाएको गाँउपालिका अध्यक्ष हरिचन्द्र बस्नेतले बताए ।
