राजेन्द्र कार्की । जाजरकोट

रुकुम घटनाको निश्पक्ष छानवीनको माग गदै जाजरकोटका युवाहरुले आइतवार सदरमुकाममा प्रर्दशन गरेका छन् । गत १० जेठमा रुकुमको सोती घटनामा मारिएका नवराज सहितका मृतकका परिवारको न्यायका लागी युवाहरु प्रर्दशनमा उत्रिएका हुन् । प्रदर्शनकारीले पुर्व गृहमन्त्री जनार्दन शर्माको पुत्ला समेत जलाएका छन् ।

हत्यारालाई कारवाही गर, घटनाको निश्पक्ष छानवीन गर, घटनालाई तोडमोड गर्न खोज्ने जनार्दन मुर्दावाद, मृतकलाई शहिद घोषणा गर लगायतका नारा लगाउँदै बजार परिक्रम गरेर विरोध गरेका हुन् । नेपाल विद्यार्थी संघको अगुवाइमा भएको प्रदर्शनमा स्थानिय युवा युवतीले साथ दिएका थिए । लकडाउनको प्रवाह नगरि उनीहरु न्यायको लागी प्रर्दशनमा उत्रिएको बताएका छन् ।

घटनालाई राजनैतिक पहुँचका आधारमा पुर्वगृह मन्त्री तथा पश्चिम रुकुमका साँसद शर्माले घटनामा संलग्नलाई जोगाउन खोजेको भन्दै उनको पुत्ला जलाईएको नेपाल विद्यार्थी संघका जिल्ला अध्यक्ष ललित बस्नेतले बताए । घटनालाई तोडमोड हुन नदिन वारम्बारको खवरदारी आवश्यक रहेका कारण विरोधमा उत्रिनु परेको बताउँदै उनले घटनाको निश्पक्ष छानवीन हुनु पर्ने, स्थानिय देखि केन्द्रिय सत्ता सम्मको प्रभाव पर्न नहुने माग गरे । घटनाको निश्पक्ष छानवीन हुनेमा पिडित परिवार संसयमा हुनु निकै दुखद कुरा हो । प्रेम सम्बन्ध र जातिय विभेदकै आधारमा भएको जघन्य अपराध हो । यो मानवता विरोधी वर्वर घटना पनि हो उनले भने ‘पिडितले न्याय पाउनु पर्छ । घटनाको निश्पक्ष छानवीन हुनु पर्छ ।’ पुर्वमन्त्री शर्माका भाई अनिल शर्माको ससुराली सोती गाँउका मल्ल परिवार हुन् । घटनामा वडाध्यक्ष डम्बरबहादुर मल्ल सहितका गाउँलेहरुको संलग्नताको आरोप लागिरहेको छ । पुर्व माओवादीका कार्यकर्ता र भाइका ससुराली पट्टीका उनीहरुलाई जोगाउन नेता शर्मा लागेको विद्यार्थी नेता बस्नेतले आरोप लगाए ।
घटनामा परि नवराज सहित पाँच जनाको ज्यान गएको छ । भेरी नगरपालिका ११ का गोविन्द्र शाही अझै हराईरहेका छन् । उनको खोजी कार्यभैरहेको छ ।